கல்விக் கடன்

சில தினங்களுக்கு முன்பு சன் டிவியில் ஒளிபரப்பாகும் "டீலா நோ டீலா" நிகழ்ச்சியில் கிருஷ்ணகிரி அருகே உள்ள ஒரு கிராமத்திலிருந்து சங்கரி என்ற பெண்மணி கலந்து கொண்டார். சத்துணவு கூடத்தில் சுமார் 27 ஆண்டுகளாக பணியாற்றும் அவருக்கு இரண்டு மகள்கள். இரண்டு ஏக்கர் விவசாய நிலம் இருந்தும் தண்ணீர் வற்றிவிட்டதால் விளைச்சல் இல்லை. கணவருக்கு வேலை இல்லை. ஏழ்மையான குடும்பம். ஆனால் இரு மகள்களையும் நன்றாக படிக்கவைத்து மூத்த மகளுக்கு திருமணத்தையும் முடித்துவிட்டார்கள்.

இளைய மகளை வங்கியில் கடன் வாங்கி எம்.எஸ்.சி, எம்.பி.ஏ வரை படிக்கவைத்துவிட்டார்கள். படிப்பு முடியும் போதே 25,000 ரூபாய் சம்பளத்தில் வேலையும் கிடைக்கும் வாய்ப்பு. மகள் சம்பாதித்து கடனை கட்டிவிடலாம் என்று நிம்மதியாய் இருக்க, அந்த எதிர்பாராத சம்பவம்! தேர்வு முடிந்து வீட்டிலிருந்த மகளுக்கு திடீரென காய்ச்சல். அருகில் உள்ள மருத்துவரிடம் காட்டியும் காய்ச்சல் குறையவில்லை. மருத்துவமனையில் அனுமதித்து சில மணி நேரங்களிலேயே உயிர் போய்விட்டது. மூளையில் கட்டி (Brain Tumour)!

வார்த்தைகளில் விவரிக்க முடியாத வேதனை. படிப்புக்காக கடன் வாங்கிய வங்கியில் கடனை திருப்பி கட்ட சொல்லிவிட்டார்கள். "டீலா நோ டீலா" நிகழ்ச்சியில் வரும் பணத்தை வைத்து, அந்தக் கடனை அடைப்பதன் மூலம் என் மகளின் ஆத்மா சாந்தி அடைய வேண்டுவேன் என்றார் அந்தத் தாய்.

விவசாயத்திற்காக அரசாங்களால் கொடுக்கப்படும் கடன்கள், சம்பந்தப்பட்ட விவசாயி அகால மரணம் அடைந்தால் அந்தக் கடன் அரசால் தள்ளுபடி செய்யப்படுகிறது. இதனால் தான் இந்த நாட்டில் லட்சக்கணக்கான விவசாயிகள் தற்கொலை செய்து கொள்கிறார்கள். தற்கொலை மூலம் கடனாவது தள்ளுபடி ஆகட்டும் என்று தான். விவசாயத்தில் வருமானம் இல்லாததாலும், வருமானம் ஈட்டக் கூடிய குடும்பத் தலைவர் மரணம் அடைந்துவிட்டதாலும், அந்த குடும்பத்தை காப்பாற்ற அரசு, கடன் தள்ளுபடி செய்யும் கொள்கையை வைத்துள்ளது.

இதே "logic" கல்விக் கடனுக்கும் பொருந்தும் தானே?

கல்விக் கடன் பெருபவர்கள் பெரும்பாலும் ஏழை, நடுத்தர குடும்பத்தை சேர்ந்தவர்கள். மாணவனோ, மாணவியோ படித்து முடித்து சம்பாதித்து தான் அந்த கடனை கட்ட முடியும். திடீரென்று ஏதாவது அசம்பாவிதங்கள் நடந்துவிட்டால் அந்தக் குடும்பத்தால் கடனை திருப்பி கட்ட இயலுமா? மகனோ / மகளோ சம்பாதித்து கடனை அடைத்து விடுவார்கள் என்ற நம்பிக்கையில் தானே, பெற்றோர்கள் கடன் வாங்கி படிக்க வைக்கிறார்கள். கடன் பெற்ற மாணவனோ, மாணவியோ அகால மரணமடையும் போது அந்த கடனை தள்ளுபடி செய்ய ஏன் அரசு முடிவெடுக்கக் கூடாது.

"கடன் தள்ளுபடிக்காக தற்கொலை" என்பதை தடுக்க ஆயுள் காப்பீடு போல தற்கொலை விதிவிலக்கு என்று ஒரு "rider" போட்டுவிடலாம்.